Kerollacho 'Magic' Dev

Kerollacho 'Magic' Dev

                                                                                     - Jose Salvador Fernandes

Keroll. Kerollantlem Muringur. Hi svat borich nanvosti zalea. Devponnachea nimitan protek satolleant 
kitleaxeach rajyantlo, kitlosoch lok thoinsor zomta. Zati-katicho bhed-bhav na. Dhormachem-i on'tor na. 
He svater devosponn cholovpacho mukhel hetu mhollear: Az bhavarthi mon'xamni, niz Devak onnbhovop, 
bhogop. Punn halinchea kallar 'bhavarthi' mhunnun zo lok thoim veta, to tor Devak onnbhovunk- bhogunk 
vochona. Punn aplea oddchonneanchea jivitant ek 'magic' zaunchi mhunn vetat.

He svater panch disancho 'retreat' asta. Bhavarthan, urben, mogan hea devosponnant vantto melltach. 
Tim Devak odik-komi promannan bhogtach. Tanche jinnent kosli-i oddchonn asta.  Ti oddchonn 
atmeachi, kuddichi va akh'khe jinnechi zaum. Te oddchonnik tankam zap mellta. Otmeak apo-ap 
bholaiki favta. Kuddik-ui kosli oddchonn aslear, ti-ui suttavi zata. Tednanchea kallar bhavarth asloleam 
sovem Jezu jim ochoriam kortalo, toslech torechea niz bhavarthachea mon'xam sovem az he svater 
ghoddtat.

Punn halinchea mhoineamni je vrut'tin (attitude) lok Kerollant vochunk lagla tem polletoch, monachea 
porddear vegllench kitem yeta. Aichea kallar je lok upotteo ghalun thoinsor vetat to polletoch, "he lok 
thoinsor zateleo 'magic' polleunk vetat vo ek tor apleache-i jinnent kosli tori 'magic' ghoddchi mhunn 
vetat" - oxem monak dista. Hea son'dorbhant mhaka chodd onnbhov ani zann asa ti Kristi dhormantlea 
mon'xanchi.

Az tor kristi bhou-sonkhea aplea dhormak "magic show" polletat tosle vrut'tin polletat. Tech khatir aplea
 proxnank, oddchonneank tankam vego-veg zapo zay. Hech karonnan, aplea dhormantlea sogllea 
bhoktank, vividh nanvamni ekech Saibinnik ani Devak ulo martat. Ani ulo marop-ui ott (condition) ghalun.
"Tuvem mhojer ho upkar kelo zalear, hanv tuka omkeoch vati ditelim." "Tuvem mhojem hem kam' kelear,
hanv itlim misam ditolom, hanv mhoji angvonn hea ani tea potram-masikancher uzvaddaitolom," adi.... 
Poripurnn bhavarth na zalear, Dev mhunn kitem kortolo? Uprant apleachem hem-tem kam' Dev xarti 
pavoina distoch, 'dusrea devank' sodunk-mellunk bhonvop. Kristanv lok to! Tankam aplea odchonneank 
vego-veg "solutions' zay!" "Marlo 'button'.... 'light' pettonkuch zay... 'current' asum-nasum! Sosnnikay naslolo!

Jea-jea svatancher nettan devosponnam zatat, he-te svater vizmitam ghoddtat, toslea svatank kristi lok
 bhett kelea viret ravona. "Omkech kodden omkench vizmit ghoddlem, konn dislo..." itlench tanchea 
kanant riglear puro. Uprant, 'pick-up', 'bus', adi... korun ani kitle-i duddu khorchun te svater tim pavlinch 
mhonnpachem. Ani tosleach monan az Kerollantlea Muringurant vetat zaum-ie. Ek tor thoim ghoddteleo 
'magic' polleunk, va aplea jivitant aslole oddchonnik 'magic solution' favo zaunk.

Oddchonnik sampoddlolim kaim-kaim vollkichim mon'xam jednam mhaka mell'leant tednam tannim 
mhaka ekuch sangchem: 'Kerolla gelear koxem? Thoinsoruch gelear borem!' Tanchem hem tannich 
proxn vicharpachem ani tanninch tea proxnak zap divpachem sangnnem aikotoch, mhojea monak 
kednam-kednam oxem dista: Hanchea mona pormannem, Gõycho Dev kuxin ani Kerollantlo Dev vegllo 
gay? Gõyantlea Deva poros Kerollantlo Dev odik podvedar zait? Gõyantlo Dev fatrachea kallzacho ani 
Kerollantlo Dev churchureancho gay?

Kerollant panch dis sarun portotoch, oxim tinch vollkhichim mon'xam melltoch hanvem tankam vicharop:
"Zali tuji pidda bori? Tuji oddchonn suttavi zali?" Ani nirxel'lea monan tannim mhonnchem. "Kainch 
ghoddunk na thoim. Poristhiti adle vorich asa!" Aspachich! Bhavartha viret az porian konnachech jinnent
kainch ghoddunk na. Sogllem ghoddlam tem tea-tea mon'xacho Devacher aslolea bhavarthak ani 
Devache khuxekuch lagun.

Jivitantlea oddchonnink nigut zap mellche khatir niz bhavarthan Muringur gel'lea mon'xanchi-i mhaka 
khobor asa. Punn tanche jinnentleo oddchonni pois zaunk nant; punn tea oddchonnink odik dhittayen 
fuddo korunk tankam otmik boll-kurpa favo zalea.

Az tor Muringurant kaim lok bhavarthan hea devosponnant vantto gheunk vetat. Zalear kitlosoch lok aple 
jinnent bhavartha xivay 'magic' ghoddli zalear ghoddli hea hetun vetat! Zalear, kaim lok 'fashion'-ui mhunn
vetat. Tim vetat nhoi? Ami-i ya! Kiteak vetat? Konn zanna! 'Magic' polleunk? Zaum-ie!

Kerollantlea Muringurant vochop sarkem asa va na hacher hanv bhasabhas korinam. Punn thoim 
thonttim, pangllim ani her piddank bolli poddlelim mon'xam borim zatat ti ek 'magic' oxi-i hanv 
mhonninam. Nhoi mhunn, thoinsorlo dev-ui 'magic' dev oxem mhonninam. Thoinsor devosponn cholovpi 
muniaream udexim veg-vegllea piddank sampoddlolea mon'xam sovem koslem-i 'vizmit' ghoddta zalear, 
to fokot tea-tea mon'xachea bhavarthacho ani Devacho podvedar khuxecho porinnam' oxem man'tam.

Readers' Views

Post Your Views

Other "English" Articles

• Obituary of Fr. Matthew Almieda, S.J. (25 February '09)
• GOA'S VERY OWN "WREN & MARTIN" (25 February '09)

Archived "English" Articles

• Sindhi Language, ready to take off in Roman Script By: Wilmix Wilson Mazarello (09 March '09)
• tiatro akademi (13 January '09)
• Ballok Jezu: a new Konknni monthly (06 January '09)
• Divo Puraskar (06 February '09)
• Konknni Literary Conference (06 January '09)
• Politicians and Konknni (23 December '08)
• SETTLING OLD SCORES by Ashok R. Kavi (20 December '08)
• Floriano Vaz, Innocent Martyr? (20 December '08)
• Release of SOD 13 & Konknni Borounchi Promann Rit (Second Edition) (23 December '08)