Home | Contact Us | Sitemap

Bolkanv

Fr. Matthew Almeida, S.J.
(25 February '09)
 

 

MATTHEW ALMEIDA, S.J.

(29.09.1935 - 18.02.2009)

Hanv tumche lagim sonvsarantlea mhojea jivita vixim ulounk axetam. Hanv 29.09.1935 disa Karnatakachea Udupi jil'lheachea Kundapur ganvant zolmolom. Mhaka teg bhav ani tegi bhoinni asleo. Mhojea bhavnddam modim hanv sovo. Tim sogllim mhoje poilim sorlim. Tanche mellint hanv nimanno mell'lom.

Hanv lhan astana mhozo bapuy somplo. Mhoje avoyn amkam Kundapur ganvant amchea mamalea ghorant vhodd kelim. Mhojem mullavem xikop hanvem teach ganvant ani madheomik xikop Kallianpur Milagris iskolant kelem.  12 Julay 1952 ver hanv Jezvit sonvsthent bhitor sorunk Belgaum ailom.  Mhojem don vorsanchem Novixiett xikop ani tin vorsanchem Juniyorett xikop hanvem Mumbai xarantlea Vinayalaya sonvsthent kelem. Uprant mhaka 3 vorsanchi Filosofi korunk De Nobili College, Pune hanga dhaddlo.  Hem xikop zatoch hanvem tin vorsam St. Vincent iskolant Rijenxi keli. Thoim mhojem mukhel kam' iskolant xikounchem aslem. Tioloji korunk mhaka porot De Nobili dhaddlo. Suttiechea disamni Madhya Pradesh hanga hanvem Bharotiy songit ani toblem hanchem xikop kelem. 24 Mars 1965 ver mhaka padriponnachi ord mell'li.  Mhoje ordi uprant poilech pavttim mhaka mhoje avoyk, bhanvddank ani soireank mellchi son'd mell'li. Ordi uprant Ttorxiyonxip xikop korunk mhaka Hazaribag vechem poddlem. Hanvem Inglez sahityant Karnataka University, Dharwad hanga M.A. xikop kelem. Gõyant B.Ed. ani M.Ed. xikop puray kelem. Hea sogllea podveamni hanv poilea vorgant poilom ailom.  St. Britto iskol, Mapxem (don pavtti), Loyola iskol, Moddganv ani St. Paul iskol, Belgaum hanga hanvem ghorcho vhoddil, iskolacho prinsipal va adari prinsipal mhonn zobabdari ghetli. 1978 vorsa Gõy Pune prantachea Jezvitamni Konknni sonvstha ugti korunk yevjilem ani Pratap Naikak hea vavrak vinchun kaddlo. Dusro konnuch Jezvit hea vavra khatir fuddem sorunk na dekhun hanv fuddem ailom ani hea vavrak favoti toyaray korche khatir bhasvijnant podvi gheunche khatir hanv Ut'tor Amerikechea Georgetown University, Washington hanga gelom.  Thoim hanvem M.S. and Ph.D. xikop kelem.  1985 vorsa Agostant hanv Gõyam pattim ailom. Setembr 1985 thavn May 2002 meren Thomas Stephens Konknni Kendracho (TSKK) hanv direktor ani bhanddari aslom. Miramar vottarachea Loyola Hall hanga TSKK astana hanv thoim 1993 te 1998 meren ghorcho vhoddil aslom.  Te bhair Gõy Jezvit prantachea vhoddilank bud divpi mhonn hanvem kam' pollelem.  Prantik vhoddil naslolea vellar vavurpi prantik vhoddil mhonn mhoji nemnnuk zalea. May 1998 vorsa TSKK Porvore vottarant aplea svotachea bandpant ailem ani hanv thoim vhoddil aslom.

2000 vorsa TSKK Research Bulletin Sod nanvachem, sod kel'le lekh uzvaddak haddchem nemallem hanvem som'padit korunk suru kelem ani tachi zobabdari 2007 meren polleli. 2006 Julay pasun Dor Mhoineachi Rotti hachi zobabdari mhojer poddli. Fr. Ave Maria borabor hem kam' hanv kortalom.  Hanvem Konknnint ani Konknni bhaxe vixim Inglejint zaite lekh boroyleat ani te nemalleamni uzvaddak aileat.  Hanvem boroylolim va som'padit kel'lim va lipiantor kel'lim 14 pustokam asat.  Zaite zannkar mhonntat mhojim tin pustakam mhotvachim ani molachim. Ti mhonnlear, 1. A Description of Konkani, 2. Konknni Basic course (Konknni Mullavo Kors in Devanagari script) ani 3. Romi Lipient Konknni Kors.  Gõy sokarachea, Kendr sorkarachea, Gõy univorsittichea ani her sonvsthanchea vivid somitincho hanv vangddi aslom.  TSKK-cho karbhar soddun hanvem thoinsor sod korpi ani xikovpi mhonn seva dilea.  Bharotiy ani ostmotechem songit aikunk, pustokanchi bhaili sozavott korunk, sonvsthanchim chin'nham (logos) toyar korunk, randunk, keki korunk mhaka khub khuxalkay bhogtali.  Konknnichi mhoji seva polleun 1993 vorsa Abril 16 ver Institute Menezes Bragança hannim mhaka tanche sonvsthecho "corresponding member" hi podvi dili ani Goa Konkani Akademin 24 Abril 2008 vorsa alpo poilo Sahitya Prajnya Puroskar mhaka dilo.

Budvara 18 Febrer disa don'param 12.57 vorancher mhaka Porvorechea JMJ hospitolant kallzachea atakan moronn ailem.  Tache adim nov dis hanv boro nastana hospitolant aslom. 19 ver mhojea mornnachi rit Holy Family Igorjent sanjechea 4 vorancher zali. Gõyche Arse bisp Filipe Neri Ferrão hannim Mis bhettoylem. Tanche borabor zaitea padrimni, madrimni, dharmik bhavamni ani lokan vantto ghetlo ani mhoje khatir magnnem kelem. Tanchea magnnea ani hajiri khatir hanv tancho upkari.  Hanv chodd korun upkar attoytam TSKK ghoranneacho. Tannim mhaka aplo mog dilo, mhoji apulkayen seva keli. Tanchea sangata vavurtana mhojim dennim ani takot vaddli ani ful'li. Mhojea zoitant tancho motto vantto asa. Mhoje zaite ixtt kednam-i mhonntat, "Matev thonddsannen guptim vavr korpi. To unnem uloyta ani chodd kam' korta." Va "Matev polleunk sado dista, punn to khoroch huxar zannkar." Hem aikun hanv fokot amurko hanstam, kiteak utram poros kornneo chodd uloytat oxem mhaka dista.

Sod vavr korchi Jezvitanchi porompora. Punn ho vavr korunk ani Gõyant Konknnichi seva korunk tornatte fuddem soronant tem polleun hanv dukhi zalam. Mhojea vangddea Fr. Pratap Naika borabor hanv 25 vorsam jiyelam. Tantlim 23 vorsam ami TSKK hanga sarleant. Ami sangata vavr kela, khann jevonn pivonn kelam, ami hansleanv, roddleanv.  Ami khub vixoyancher kholayen bhasabhas kelea.   Ami don kuddimni jiyetoleanv, punn eka monache ani eka kallzache asleanv.  Loka khatir ani Konknni khatir hanvem thoddi seva dilea.  Mhozo urlolo vavr tumche modlea huxar tornatteamni fuddem vhorunk asa. Mhoji nimanni ek axa: Gõychea dor eka ghorachi bhas Konknni aschi ani ti thoddi tori vachchi ani xikchi. Amchi bhas ami voir kaddli na zalear ti ani konn voir kaddtolo?  Amchi bhett zai meren mog asum ani Adeus. 

 

 

 

 
AICHEM JEVONN
Kitem korum yeta hachi zannvikay tumkam proyotn kelea bogor mellchi na.
Read more..
KONKNNI
Bolkanv
Konknni mollar Gõycheo ani her ganvcheo mukhel ghoddnnuko
Angonn
Bhurgeam khatir gitam, kovita, kannio ani her bhurgeanache avddiche borpavollicho punzo.
Motiam
Novim utram, tanchi mahiti ani vapor.
Umalle
SMS-achea mollar Konknni.
Mhoineache Suvalle
Gõychim festam, porbo ani zatra
Lokdaiz
Konknni mon’xachem purvil’lem bhanddar (gitam, kannio, mhonni, humannim, opari, adi).
Lekh
Konknni Sod lekh ani her prokarache lekh.
Kotha
Konknni kotha.
Kovita
Konknni kovita ani gitam.
Ankri
Novim pustokam, CD hanchi vollok.
SOD
Research articles published in TSKK Research Bulletin.
ENGLISH
Designed by Team Inertia Technologies