Home | Contact Us | Sitemap

Lekh

AMCHEA SONVSARI MONACHO ARSO ?
(15 April '09)
 

AMCHEA SONVSARI MONACHO ARSO ?

                            -Jose Salvador Fernandes

Moddganvam ‘Tato' Hottelant bosun aslom. Limbu sodachea glasak thambun thambun ghontt martolom. Khorem mhonnlear, teach hottelant mellpachem tharaylolem. Konn eklean ani hanvem. Taka mhoje kodde gorjechem kam' aslem khoim. To apoilolea vellar pavunk na. Dekun, ek limbu soda ‘order' korun tachi vatt pollet ani tachi vatt polletam polletam glasak ekek ghontt martalom.

Kuxichea mezachea kodelincher don ostoreo bosun asleo. Ekleche khankent eka  vorsacho baba aslo. Don-ui ostoreo bhaji-puri khait uloytalim.

"Babachea 1st ,birthday'-ak itlo lok zatolo mhonn hanvem chintunk nam."   Bhurgeache avoyn purecho kuddko khait sanglem.

 "Bhurgeanchea ‘birthday'-ank lok yeta go. Amchea Jerrychea ‘birthday'-ak polleunk na tunvem?" Tichi sangati ostori uloyli.

"Punn kitem-i zaum babak ‘gift' mat khub aile. Dudduch mhonn  ‘sixteen thousand'  odik ‘gift' aile. Tea bhair her ‘gift'." Avoy dhadosbhorit mukhamollan uloyt asli.

 "Terezinhak hanvem ‘special' bibik korun haddunk laylolem. Tachim bibikam borim zatat. Ani tannem babddean, don kil odik bibik korun haddlem. Bibik-ui borem zal'lem. Ani nonnddek hanvem ‘baby cycle' haddunk layloli. Tinnem haddli. Bori dista." Ti avoy motteponnan uloyt plettintli bhaji sompoupachich asli. Tem polleun veittor tanchexim ubo zalo.  Tanche kodde fuddli ‘order' vicharli. Tannim falodda ‘order' keli.

Veittor tanche sorxilo koddsortoch, porot-ui tancheo gozali suru zaleo.

Babachea ‘birthday'-acheoch. Tancheo fuddleo gozali mhaka uprant aikunk mellunk nant. Tednam mhonnosor, hanv zachi vatt polletalom, to pavun sorlolo.

Ratcho jevun hat dhutalom tednam, tea ostoreanche ‘birthday'-ache gozalicho mhaka ugddas ailo. Monant mhonnlem  "kitem nhoi lok?"

Bhurgeacho zolma dis somorombhunk fuddem sortat, ani lokak ho ani to ‘gift' haddunk boll kortat. Punn  oslea somarombhak bhett vo ‘gift' khuxen haddpache astat nhoi? Zalear, tankam hi vo ti bhett-vostu hadd mhonn amchean koxem sangum ieta? Ghoddie, sangum yena mhonn khoinch boroylolem na dekunch sangtat zait!

 Aiz mon'xachem mon sonvsari vostumni itlem gul'l zalam, ki to aplea bhurgeank lhanachim vhodd kortana sonvsari mona pormannench voir kaddunk vavurta. Bhurgeancho fuddar ani jivit sonvsari vostuncheruch adarun aslolea porim. Aiz ami sabar zann amchea lhan bhurgeancho zolma dis somorombhtat, ani dobajeak yevpi soiream-daiream, ixttam kodden, amchea bhurgeam khatir ‘gift' mhonn khub kitem anvddetanv ani magtanv. Sonvsarantleo veg-veglleo vostu.

Lhan bhurgeanchea nanvan ami amkam khuxi tem magtanv. Ani amchem sangnnem aikopi amcho mogacho-i amkam na mhonnina.

 Bhurgeak ami lhanacho vhodd korpachi zababdari amchea bhuzancher asta tednam tanchea zolma disachea somarombhak ‘gift' mhonn ami kednam konna kodde Povitr Pustok  kiteak magonant? Bhurgeanchea zolma disak ailolea her bhett vostunk jem mhotv-mol asta tem Povitr Pustokak na mhonn kai? Bhurgeanchea zolma disache parttiek ailoleo bhett-vostu ibadd zaina zaunk, bhurgo vhodd zait porian ami teo tachea ugddasak ‘show' kesint samballun dovortanv. Punn, bhurgo lhanacho vhodd zatana tachem jivit atmik nodren vaddot fulot vechem, vaddchem mhonn zacho ‘show' kesint dovrinastana sodankal vapor korum yeta, tea Povitr Pustokachi ‘gift' mhonn  amkam vhoddilank kiteak otrek nant?

Mhojea monant oxe he vixim proxn upzot asat toxe, vachpea tujea-i monant veg veglle proxn uprasun tum-ui vichar korunk lagla zait.

Korcho, jerul vichar korcho. Vichar korpa sarkich gozal hi...!

 

 

 

 

Archived Articles

AICHEM JEVONN
Xikxonn hench osurokxitechem vokot.
Read more..
KONKNNI
Bolkanv
Konknni mollar Gõycheo ani her ganvcheo mukhel ghoddnnuko
Angonn
Bhurgeam khatir gitam, kovita, kannio ani her bhurgeanache avddiche borpavollicho punzo.
Motiam
Novim utram, tanchi mahiti ani vapor.
Umalle
SMS-achea mollar Konknni.
Mhoineache Suvalle
Gõychim festam, porbo ani zatra
Lokdaiz
Konknni mon’xachem purvil’lem bhanddar (gitam, kannio, mhonni, humannim, opari, adi).
Lekh
Konknni Sod lekh ani her prokarache lekh.
Kotha
Konknni kotha.
Kovita
Konknni kovita ani gitam.
Ankri
Novim pustokam, CD hanchi vollok.
SOD
Research articles published in TSKK Research Bulletin.
ENGLISH
Designed by Team Inertia Technologies