CHANI BAYE CHANI BAYE

Chani baye, chani baye
Chinv chinv kiteak kortai?
Mogan tuka apoylear
Dhanvun kiteak vetai?

Khaunk tuka peram ditam
Dhakttim vhoddlim toram ditam
Tujea pilank hanv khelloytam
Tuje songi hanvui yetam.

Chani baye, chani baye
Pattim tum vocho naka
Manddier mhoje bosun
Kanni sang mhaka.

 Xinvachem Moronn

Vhoddlea ranant ek  Xinv ravtalo.   Aplem sogllem ayux bhor to eka raza vorim jiyelo.  Tachea zanntteaponnar to khub oskot zalo.  Taka konn respet dina zalim.  To samko oskot zaun mornnache tonnir aslo tednam ek Randukor yeta ani aplea sullea dantan taka ek dhongso diun apli adli dusmankai kaddta.  Uprant ek Boil yeta ani aplim Xingam tachea pottant dhongxita.  Tem polleun vatte velean vetolem ek Gaddov yeta ani Xinvache tokler  khontto ghalta.  Xinv sarko vollvoll'lo "Tim dogaim bollixt savzam yeun tannim mhaka piddlo tem mhojean sonsunk zalem punn morchea vellar Gaddva sarkea nich zonavora koddlean khontto gevpa poros don pavtti moronn upkarta. Udentechea Suriak soglle nomoskar kortat punn mavolltoleak konn korina."

Mon'xa kodde vhoddponn asa-sor soglle taka solam' kortat punn toch monis jednam dubllo zata tednam taka sunnea paxtt lekhtat.

Varem ani Suria ek dis zhogddunk laglim.  Varem mhonnta apunn chodd bollixt tor Suria mhonnta apunn chodd, oxe dogui zhogddunk lagle.  Vattevelean vetolo ek vattsuro tankam dixtti poddlo, tannim dogaimni apnnali xokt tea vattsureacher vaprun pollevpachem tharailem. Tea vattsurean ek lamb kott ghal'lo, to kott konn kaddun uddoita to chodd bollixt zatolo mhonn tharlem.  Varem apnnali soglli sokt ekttaun nettan vhallunk laglem.  Vareacho nett polleun tea monxean apnnalo kott anikuch ghott' dhorlo.  Vareak yes mell'lem na, tednam Suria fuddem sorlo ani tannem vattsureacher matxem vot ghalem, tea vattsurean apnnalo kott matso dhil soddlo, uprant Surian ani matxem khor vot ghalem, tea vattsurean kott kaddun khandar uddoilo.  Suriachem vot jednam ani khor zalem tednam tea vattsurean apnnalo kott thoinch kaddun uddoilo ani fuddem vochunk laglo.

Ekech pavttim zobordosti korche poros, il'li-il'li somzavnni dil'li chodd bori.

Onnkar korpi: Shilpa Salvi

AMCHE IXTT

Amchea ganvche kamgar
Kam' korunk huxar
Tankam lagun ganvkar
Asat sodam khuxal.

Xetkar xet pikoyta
Sutar khatt mez korta
Poder undde bhazta
Render sur kaddta
Sonar bhangram korta
Vollar kankannam haddta.

Kharvi nustem dhorta
Xinvpi kopdde xinvta
Gonvddi ghoram bandta
Malli zhaddam layta
Mochi zotim korta
Paddeli narl paddta.

Moddvoll kopdde dhuta
Mhalo kens kapta
Kum'bar moddkeo korta
Dotor vokhtam dita
Kuroikar chitti haddta
Posorkar vostu vikta.

Kamgar amchea ganvche
Ixtt te amche khore
Tankam lagun amchem
Jivit cholta borem.

Pratap Naik, S.J.

AILO RE FORSO

Ailo re Forso
Kednam-i burso
Angar kunkuddso
Jevnnak bosta to
Pacha pacha korta to.

Hat dhuina, tondd ghaxina
Jevnnak bostana
Ho koslo kanttallo
To koslo ghannerddo.

Hevtten polloyna
Tevtten polloyna
Unddio volltana
Unddio vollta to
Boka boka korta to.

Surr korta, burr korta
Jevonn jevtana
Taka gillunk re pavona
Tachem dholkem bhorona.